Дастаи мунтахаби Русия – ғолиби Мусобиқаи ҷудо ба номи Ҷигоро Кано
Дар шаҳри Владивостоки Русия Мусобиқаи байналмилалии ҷудо ба номи Ҷигоро Кано, ки дар доираи барномаи варзишии Форуми 4-уми иқтисодии шарқ баргузор шуд, ба поён расид.Мусобиқа дар шакли даставӣ тибқи қоидаҳои Федератсияи байналмилалии ҷудо (IJF) сурат гирифта, дар он тими мунтахаби Русия бар дастаи яккачини ҷаҳон бо ҳисоби 4-3 пирӯз шуд.
Тоҷикистонро дар ин мусобиқаи анъанавӣ Сомон Маҳмадбеков (-73кг), ки шомили дастаи яккачини ҷаҳон буд, муаррифӣ кард.
Ҷудокори тоҷик бо Қаҳрамони феълии Аврупо миёни ҷавонон - Казбек Нагучев (Русия) нерӯсанҷӣ кард. Варзишгарон дар вақти асосӣ ғолибро муайян карда натавонистанд. Дар «голден-скор» бошад, ҷудочии рус ба хотири камфаолӣ ва ҳамеша дар ҳоли дифоъ будан, танбеҳи сеюмро дарёфт кард ва рақобатро ба Сомон бохт.Ҳамчунин, дар вазни -90кг Ёқубҷон Назиров – зодаи Тоҷикистон, ки Русияро намояндагӣ мекунад, ширкат варзид. Мутаассифона, Ёқубҷон рақобатро ба ҷудокори Маҷористон - Роланд Гоз бо ду «ваза-ари» бохт.
Хотиррасон мекунем, ки ба ҳайати яккачини ҷаҳон қаҳрамону ҷоизадорони Чемпионати ҷаҳон-2019 миёни ҷавонон аз кишварҳои Туркия, Олмон, Нидерланд, Фаронса, Маҷористон ва Тоҷикистон шомил буданд.
