Дар толори Муассисаи давлатии мактаби ҷумҳуриявии тайёрии олимпии дастаҳои мунтахаб (“Манеж”) рӯзи 30-юми январ мусобиқаи ҷумҳуриявӣ оид ба гӯштини ҷудо байни калонсолон оғоз шуд.

Мусобиқаи мазкур бо ташаббуси Федератсияи ҷудои мамлакат дар ҳамдастӣ бо Кумитаи кор бо ҷавонон ва варзиши назди Ҳукумати Ҷумҳурии Тоҷикистон роҳандозӣ шуда, ҳадаф аз он муайян кардани мавқеи паҳлавонон дар радабандии ягонаи умумиҷумҳуриявӣ аст. Ин имкон медиҳад то ҳангоми сафарбарии онҳо ба мусобиқаҳои байналмилалӣ мураббиён чеҳраҳои беҳтаринро бе мушкилӣ интихоб намоянд.

Дар рӯзи якуми қувваозмоиҳо ҷудокорони вазнҳои -60кг, -66кг ва -73кг, рӯи татами баромаданд. Бо сабаби зиёд будани шумораи иштирокчиён, рақобатҳо аз муддати ба нақшагирифташуда зиёдтар тӯл кашид. Новобаста аз ин вохӯриҳо бисёр ҷолибу диданӣ буд.