Дилшодбек Юлдошев - барандаи Ҷоми Президент дар вазни -66кг
Дар Қасри теннис ва маҷмааи варзиши обии шаҳри Душанбе 8-умин Мусобиқаи байналмилалии ҷудо барои дарёфти Ҷоми Президенти Ҷумҳурии Тоҷикистон 2021 (International judo tournament for the Cup of the President of Tajikistan 2021) ҷараён дорад.Дар рӯзи аввали мусобиқа рақобатҳо барои ба даст овардани ҷойҳои ифтихорӣ дар вазни -66кг сурат гирифта, ҷудокори ботаҷрибаи Ӯзбекистон – Дилшодбек ЮЛДОШЕВ соҳиби 8-умин Ҷоми Президенти Ҷумҳурии Тоҷикистон гардид.
Дилшодбек дар даври якум бо Худобахш СУЛАЙМОНОВ (Тоҷикистон) нерусанҷӣ кард. Ҷудокори ӯзбек дар дақиқаи дуюми рақобат бо иҷрои усули зебои «ура-нагэ» имтиёзи «ваза-ари» ба даст оварда, онро то охир ҳифз намуд ва ғолиби ин рақобат гардид.
Дар даври дуюм ЮЛДОШЕВ бо Саидбек ҶОРУБОВ (Тоҷикистон) вориди майдони рақобат шуд. Ин навбат Дилшодбек бо усули «сэои нагэ» ҳарифро шикаст дод ва ба даври навбатӣ роҳ ёфт.
Дар сеюмин рақобаташ ҷудочии ботаҷрибаи ӯзбек, варзишгари Тоҷикистон - Масъуди АҲМАДЗОДро дар сонияҳои охири қувваозмоӣ бо «тай отоси» шикаст дод ва ба даври чорякниҳоӣ баромад.
Дар чорякниҳоӣ дар «голден скор» ҷудокори дигари тоҷик – Фаррух ҲАЛИМОВро мағлуб кард.
Дар ниманиҳоӣ варзишгари Ӯзбекистон бо ҳамватанаш – Муҳриддин ТИЛОЛОВ рақобати шадид анҷом дод. Юлдошев, ки пас аз гузашти се дақиқа танҳо ду «шидо» дошт, дар дақиқаи охири рақобат ташаббусро ба даст гирифта, тавонист дар бахши «не ваза» (кор дар замин) имтиёзи «ваза-ари» касб кунад ва ниҳоятан 35 сония монда ба анҷоми нерусанҷӣ бо усули «учимата» ҳамдиёри худро шикаст диҳад ва ба финали мусобиқа роҳ ёбад.
Дар рақобати ниҳоӣ Фирӯз МЕЛИБОЙЗОДАро (Тоҷикистон) дар дақиқаи дуюми майдондорӣ бо «тай отоси» ноком кард ва ғолиби мусобиқа дар вазни -66кг гардид.
Натиҷаҳои ниҳоии -66КГ:
1. Дилшодбек ЮЛДОШЕВ (UZB)
2. Фирӯз МЕЛИБОЙЗОДА (TJK)
3. Орифҷон ДОДОВ (TJK)
3. Абубакр БОҚИЕВ (TJK)
5. Муҳриддин ТИЛОЛОВ (UZB)
5. Фаррух ҲАЛИМОВ (TJK)
Пас аз анҷоми қувваозмоиҳо ба ғолибон ва ҷоизадорони мусобиқа ҷоизаҳои молӣ тақдим гардид. Барои ҷойи 1-ум Дилшодбек ЮЛДОШЕВ бо 30 000 сомонӣ, Фирӯз МЕЛИБОЙЗОДА – 10 000 сомонӣ, Абубакр БОҚИЕВ ва Орифҷон ДОДОВ бо 5000-сомонӣ сарфароз гардиданд.
Фардо, 4-уми Октябр, ҷудокорони вазнашон -81кг рӯи татами мебароянд.
Барномаи баргузорӣ:
4-уми Октябр | Душанбе | Рӯзи 2
Мардҳо: -81кг
Рақобатҳои муқаддамотӣ: 10:00-14:00
Марҳилаи ниҳоӣ: 18:00-20:00
Қуръакашии вазни -90, +90кг
5-уми Октябр | Сешанбе | Рӯзи 3
Мардҳо: -90, +90кг
Рақобатҳои муқаддамотӣ: 09:30-15:00
Марҳилаи ниҳоӣ: 18:00-20:00
*Вақти Душанбе